पुर्नवास अभियानमा (मोना) जापान नागोया बाट झन्ढै ६ लाख आर्थिक सहयोग।

बाढी पहिरोबाट विस्थापित म्याग्देलीको पुर्नवासमा म्याग्दी प्रवासी नेपाली संघ (मोना) क्षेत्रीय कार्यसमिति जापान नागोयाले झन्ढै ६ लाख आर्थिक सहयोग जुटाएको छ ।
गएको असार २५ गते पश्चिम म्याग्दीको धवलागिरी गाउँपालिका–६, मराङ र मालिका–७, बिम, उत्तरी म्याग्दीको अन्नपूर्ण–३ फगाम लगायत जिल्ला विभिन्न स्थानमा बाढीपहिरोबाट विस्थापित भएकाको पुर्नवास अभियान नागोयामा बसोबास गर्ने म्याग्देलीको साझा संस्था मोना मार्फत ५ लाख ९३ हजार २९६ रुपैयाँ मोना जापानका अध्यक्ष दिपक कार्कीलाई हस्तान्तरण गरिएको छ ।
पूर्ण गर्बुजाको संयोजकत्वमा संकलन गरिएको आर्थिक मोना जापान क्षेत्रीय समिति नागोयाका अध्यक्ष रुपेश चोचाङ्गी र कोषाध्यक्ष राम किसानले हस्तान्तण गर्नुभएको हो ।

सोही अवसरमा मोना जापानका अध्यक्ष कार्कीले उक्त सहयोगलाई मोना अन्तराष्ट्रियको गरिमा विकास बैंकको खातामा जम्मा गरिने बताउनुभयो ।

‘यो हस्तान्तरणले हाम्रो सहकार्यमा नयाँ उर्जा थपिएको छ,‘बाढीपहिरोबाट विस्थापितले छिट्टै घर पाउनेमा आशाबादी छौ‘ कार्कीले भन्नुभयो । सोही अवसरमा क्षेत्रीय समिति नागोयाका अध्यक्ष चोचाङ्गीले आफ्नो गास काटेर म्याग्दीका बाढीपहिरो पीडितलाई सहयोग गरेको बताउनुभयो ।
‘यहाँ सहज भएर होईन्, आफ्नो जिल्लामा घर भत्किदाँ मन दुखेर सहयोग जुटाएका छौ,‘सहयोगले पुर्नवास अभियानमा सहज हुनेमा हामी ढुक्क छौ’ उनले भने । मोना जापानले उक्त सहयोगसँगै टोकियो लगायत विभिन्न सहरमा संकलन भएको अन्य रकमलाई पठाउने गणेश श्रेष्ठले जानकारी दिनुभयो ।

कोरोना भाइरसको जोखिमले ब्यवसाय र रोजगारीमा समस्या भएपनि म्याग्देली सहित नेपालीले अभियानमा साथ दिएका छन् ।
मोना आपतकालिन राहत कोषमा अहिलेसम्म दुई करोड रुपैयाँ बढी रकम संकलन भइसकेको छ । यता बाढी पहिरोबाट विस्थापितलाई मोनाले विश्वभर रहेका राष्ट्रिय समितिमार्फत एकद्धार प्रणालीबाट सहयोग जुटाएर पुर्नवास अभियान सञ्चालन गरिरहेको मोना अन्तराष्ट्रियका अध्यक्ष ओमनारायण जुग्जालीले बताउनुभयो ।
मोनाले जिल्लाभर विस्थापितको स्थानीय सरकार, सरोकारवाला निकायसँग समन्वय गरी घर बनाउन सघाउने छ ।